24. lehekuud tetti Mõnistõ Talorahvamuusõumin vallalõ vahtsõnõ näütüs „Üte pilli lugu“, mink keskpunktin saisva umakandi pillimiis Artur Ammas ni timä lõõts.
Muusõumi takan elli väiksen kõllatsõn majan Amba Artur – miis, kiä uma pillimängoga saat aastakümnit nii uma perre ku ka kogokunna ettevõtmiisi. Välläpanõk tege küläliisile nättäväs silmäpilkõ Arturi ja timä perre elost Kuudsil. 1990ndil aastil filmiti Arturit innekõkkõ timä pillimängo ülesvõtmisõ jaos, a pillilukõ vaihõl kuuld timä käest ka nalju, mälehtüisi edimäidsist pillimängmiisist poiskõsõn, johtumiisi sõaväest ni muialt kah.
„Ma väega looda, et seo välläpanõk virgutas tõisi kah ummi lukõ kirjä pandma ni jagama, olkõ sõs takasttoukajas mõni asi, pilt vai hoobis nalalinõ johtuminõ,“ kitt näütüse kokkosäädjä Kätlin Hirs, Arturi latsõlatsõlats.
Mõnistõ Talorahvamuusõumi juhataja Airi Rüütli ütles lisas: „Mi muusõum pidä tähtsäs peritüid lukõ ni kogokunna mälehtüisi. Seokandi noorõl sugupõlvõl laskva säändse välläpanõgi parõmbidõ ummi juuri tundma oppi, kavvõmbast tulnuilõ küläliisile tegevä neo vallalõ vahtsit ussi seonuka elämise-olõmisõ ni rahvaperändüse mano.“
Amba Arturi umandusõst muusõummi joudnu Hohneri härmoonik om seenimaani hään kõrran ja mõistjil pillimängjil lubatas tuu pääl ka kätt pruuvi.